कदे इण आंगणै री माटी में
बाप-दादियां रै पसीनै री महक रमती,
अेक हुकारै माथै आखी भींत धूजती
अर मनवार रौ मोभ पक्को रैवतो।
आज उणी आंगणै री छाती चरड़-चरड़ फाटै
जांया-जणिया भाई अैहड़ा कुटिजै
जियां खळां में बाजरी रौ सींटो कुटीजै!
लहू सूं लहू रौ मोल नीं रयो,
सगा-स्वारथ अैहड़ा बिखर नै टूव्या
कै अबै उण काच री किरचां सूं
सिर्फ बैर री धार पिलाईजै।
अर ओ काल रौ काळियो टाबर
जिकण री छींक माथै कदे मायड़ धाबळ ढांकती,
वो आज मजलिस री गद्दी माथै बैठ
बडेरां री पगड़ी रो चीथड़ो उछाळै,
घर री आबरू नै चंवरां में फूंकी नै
आखी ओळ-पंक्ति नै नाश करै।
रात रौ अंधारो गाढो हुवै
अर दारू रौ नसो जद मगज में चवै,
तो पगां री थाप थरथराती
ओटो लांघ नै ख़ुद नै ‘ठाकर’ हमझै!
पण बावळै नै कुण बतावै-
कै भींत ढहायां कोई गढ़ नीं बणै,
अर अकल खोय नै ओरण लूटण आळो
ठाकर नीं, आपरी ई मसान रौ मुगताणो बणै।
ओ घर रो आंगणो
अबै कोई छांव नीं रयो,
ओ तो भायप री छाती माथै
हूक सूं उग्योड़ो
धधकतै अंगारां रो थळ बण गयो है।
- भारमल गर्ग "विलक्षण"
कोई टिप्पणी नहीं:
एक टिप्पणी भेजें